चर्चगेट सबवेत गतिमंद मुलीवर सामूहिक बलात्कार

www.24taas.com, झी मीडिया, मुंबई

मुंबईत धक्कादायक बाब उघड झाली आहे. चर्चगेट रेल्वे स्थानकातील सबवेमध्ये एका 15 वर्षीय गतिमंद मुलीवर सामूहिक प्रकार करण्याची घटना घडलेय. पाच जणांनी या पिडीत मुलीला बियर पाजली आणि तिच्यावर अमानुष्य कृत्य केले.

ही पिडीत मुलगी कुटुंबीयांसोबत भांडण करून रागाच्या भरात घरातून बाहेर पडली होती. तिला रेल्वे स्थानकातील सबवेमध्ये गाठून पाच जणांनी जबरदस्तीने बियर पाजून, तिच्यावर सामूहिक बलात्कार केला. ही खळबळजनक घटना बुधवारी उघडकीस आली.

या पिडीत मुलीवर वांद्रे येथील भाभा रुग्णालयात उपचार सुरू आहेत. तिने शुद्धीवर आल्यानंतर या अमानुष प्रकाराची माहिती पोलिसांना दिली. तिच्या तक्रारीवरून अनोळखी आरोपींविरुद्ध सामूहिक बलात्काराचा गुन्हा दाखल करण्यात आला आहे.

चर्चगेट रेल्वे स्थानकाला लागून इरॉस थिएटरकडे जाणाऱ्या सबवेमध्ये मंगळवारी पहाटे 2 ते 4 च्या दरम्यान हा प्रकार घडला. कांदिवली-पूर्वेला राहणारी ही मुलगी कुटुंबीयांसोबत भांडण झाल्यामुळे 28 एप्रिलला घरातून निघाली. चर्चगेट रेल्वे स्थानकालगत सबवेच्या जिन्यावर ती एकटीच बसली होती. यावेळी एकाने तिच्या तोंडात जबरदस्तीने बियर ओतली. बेशुद्ध अवस्थेत पाच जणांनी तिच्यावर सामूहिक बलात्कार केला. घटनेचे गांभीर्य लक्षात घेऊन चर्चगेट रेल्वे पोलिसांनी लगेच या मुलीची तक्रार नोंदवून घेत सामूहिक बलात्काराचा गुन्हा दाखल केला आहे.


* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.

* झी २४ तासला ट्विटरवर फोलो करा.