सगळ्या म.रे.ला आता डझनभर डब्बे

झी 24 तास वेब टीम, मुंबई
 
मध्य रेल्वेच्या मेन लाइनवर नऊ डब्यांची लोकल आता इतिहासजमा होणार आहे. कारण आजघडीला फक्त ७५ गाड्या नऊ डब्यांच्या उरल्या असून, १ नोव्हेंबरपूर्वी या सर्वच्या सर्व गाड्या १२ डब्यांच्या होतील. यामुळे म.रे.ची प्रवासीक्षमता तब्बल एक लाखांनी वाढणार आहे.
 
सध्या मध्य रेल्वेच्या मेनलाईनवर एकून ७८५ फे-या होतात. त्यापैकी ७१० फे-या १२ डब्याच्या लोकलच्या असून ७५ नऊ डब्यांच्या आहेत. या नऊ डब्यांच्या ताफ्यातील लोकलपैकी सहा लोकल या डायरेक्ट करंट पध्दतीनुसार (डीसी) सुरू आहेत. त्या सहा पैकी तीन लोकल लवकरच, तर उरलेल्या तीन ३१ ऑक्टोबरपूर्वी १२ डब्यांच्या होतील, अशी माहिती मध्य रेल्वेचे मुख्य जनसंपर्क अधिकारी व्ही.ए.मालेगावकर यांनी दिली.
 
२००९-१० या वर्षात ३७ लाख असलेली मध्य रेल्वेने दररोज प्रवास करणा-या उपनगरीय प्रवाशांची संख्या यावर्षी ३९ लाख झाली आहे. प्रवाशांच्या संख्येत दिवसेंदिवस होणारी ही वाढ सामावून घेण्यासाठी, रेल्वेची क्षमता वाढवण्याचे उपाय अपरिहार्य असल्याचेही त्यांनी स्पष्ट केले.
 
मध्य रेल्वे येत्या ऑक्टोबरपर्यत एसी आणि डिसी या दोन्ही यंत्रणांवर चालतील अशा दोन लोकल सुरू करण्याच्या विचारात आहे. यापैकी एक लोकल सप्टेंबरअखेर सुरू करण्यात येईल तर दुसरी लोकल ऑक्टोबरपर्यत सुरू होईल, अशी माहिती रेल्वेच्या वरिष्ठ अधिका-याने दिली. दोन्ही यंत्रणांवर चालणा-या लोकल सेवेत दाखल झाल्यानंतर २०१२ पर्यंत अशा दोन्ही यंत्रणांवर चालणा-या आणखी २० लोकल सुरू करण्याचा मध्या रेल्वेचा मानस आहे. दोन्ही यंत्रणांवर चालणा-या सिमेन्सच्या नव्या लोकलप्रमाणे असतील. परंतु येत्या दोन वर्षात सिमेन्सकडून मध्य रेल्वेला कोणत्याही लोकल मिळणार नाहीत. कारण या नवीन लोकल आधीच पश्चिम रेल्वेला देण्यात आल्या आहेत.
 
एसी ते डिसी अशा बदलाची प्रक्रिया ही मध्य रेल्वेचे इंजिनियर्सच करणार आहेत. मध्य रेल्वेच्या इंजिनिअर्सने या कामात स्वारस्य दाखविले असून, ते हे काम स्वत :पुढाकार घेऊन करणार आहेत. यामुळे हे काम कमी खर्चात व कमी वेळेत पूर्ण होऊ शकेल, असेही मालेगावकर यांनी सांगितले. नवे बदल करण्यात आलेल्या या लोकलचे आयुष्य १५ वर्षांचे असेल. या १५ वर्षात या लोकल नव्या लोकलप्रमाणेच सेवा देणार आहेत. सिमेन्सच्या लोकलची किंमत जवळपास २७ कोटी असून, बदल करण्यात आलेल्या लोकलची किंमत ३ कोटी आहे.