नागपूर विद्यापीठाचं विभाजन

             झी २४ तास वेब  टीम, नागपूर
राज्यातील मागासलेल्या चंद्रपूर आणि गडचिरोली जिल्ह्यांसाठी नागपूर विद्यापीठाचं विभाजन करण्यात आलं आहे. या विद्यापीठाचं विभाजन करून गडचिरोलीत गोंडवाना विद्यापीठाची स्थापना करण्यात आली. मात्र, या विद्यापीठाच्या स्थापनेपासून समस्यांचं शुक्लकाष्ठ लागलं आहे. तर, नवे कुलगुरू डॉ.विजय आईंचवार यांच्या नियुक्तीला आदिवासी संघटनांनी विरोध दर्शविला आहे. या आदिवासी संघटनांनी कुलगुरूच्या मागणीसाठी चंद्रपूर-गडचिरोली जिल्ह्यात लाँगमार्च काढून लढा पुकारला आहे. दरम्यान, मुख्यमंत्री पृथ्वीराज चव्हाण यांनी नव्या विद्यापीठासाठी आदिवासी कुलगुरूची नियुक्ती करू अशी घोषणाही केली होती.मात्र, मुख्यमंत्र्यांनी दिलेला शब्द न पाळल्यामुळे आदिवासी संघटनांमध्ये नाराजीचा सूर आहे. त्यामुळे, आदिवासी संघटनांनी याविरोधात लढा पुकारला आहे.