`एचआयव्ही`ग्रस्तांचा अनोखा विवाह

www.24taas.com, झी मीडिया, अकोला

सध्याचा काळ हा लग्नसमारंभाचा… अकोल्यातही एक आगळावेगळा लग्नसोहळा पार पडलाय...कारण या सोहळ्यात पहायला मिळाला तो माणुसकीचा गहिवर अन वंचित समाजघटकाला मुख्य प्रवाहात आणण्यासाठीची धडपड.

अकोल्यातील सूर्योदय बालगृहातील `पूजा` आणि बुलडाणा जिल्ह्यातील मेहकरचा `भास्कर` विवाहबद्ध झालेयेत. आयुष्याची नवी सुरुवात करणारे हे दोघेही `एच. आय. व्ही. पोझीटीव्ह` आहेत. अकोल्यातील `जानोरकर मंगल कार्यालया`त हा लग्नसोहळा पार पडलाय. अकोल्यात राष्ट्रसंत भैय्यूजी महाराज प्रणीत `श्री. सद्गुरु दत्त धार्मिक आणि परमार्थिक ट्रस्ट` द्वारा `सूर्योदय बालगृह` चालविण्यात येतंय. या बालगृहात सध्या एड्सग्रस्त 55 मुला-मुलींचे वास्तव्य आहे. याच बालगृहात लहान असतांना `पूजा` दाखल झाली होतीय. `पूजा`चे लग्न करण्याच्या दृष्टीने `बालगृह` आणि अकोल्यातील सामाजिक जाणीव असलेल्यांनी पुढाकार घेतला. बुलडाणा जिल्ह्यातील मेहकरचा `भास्कर` हा वर `पूजा`साठी निवडण्यात आलाय. अन `एच. आय. व्ही. पोझीटीव्ह` असणाऱ्या या दोघांच्याही आयुष्यात एक नवी पहाट उजाडलीय. अशा प्रकारचा विदर्भातील हा पहिलाच `लग्नसोहळा` असल्याचे बोलले जातेय.


`पूजा`च्या लग्नासाठी अनेक `हात` वधूपित्याच्या भूमिकेत पुढे आलेत. अन यातूनच कुणी कपड्यांचा, कुणी सोने खरेदी, तर कुणी जेवणावळीचा खर्च उचलत जबाबदारी पार पाडली. एक नवीन `आयुष्य`जगायला मिळणार या भावनेने पूजा आणि भास्कर आनंदून गेले होते. अकोल्यातील हा `लग्नसोहळा` खऱ्या अर्थाने एका नव्या पर्वाची सुरुवात करणारा ठरणार आहे.