स्ट्रॉबेरी खायचीय... मग चला की, कोल्हापूरला!

www.24taas.com, झी मीडिया, कोल्हापूर

स्ट्रॉबेरी म्हटलं की आपल्या डोळ्यासमोर येतं ते महाबळेश्वर... पण आता महाबळेश्वरमध्ये मिळणारी उत्कृष्ठ दर्जाची स्ट्राबेरी कोल्हापूरातसुद्धा पिकतेय. ऐकून चकीत झालात ना... होय पण हे खरं आहे. कोल्हापूर जिल्हयातील वडणगेमधल्या प्रयोगशील शेतकऱ्यानं आपल्या शेतात चक्क स्ट्रॉबेरीचं पिक घ्यायला सुरवात केलीय.

उसाचा पट्टा म्हणून कोल्हापूर जिल्हयाची ओळख... जिल्हयात अनेक साखर कारखान्याबरोबर गुऱ्हाळघर असल्यामुळं इथाला शेतकरी उस शेती करणं पसंत करतो. पण गेल्या काही वर्षापासुन इथल्या काही शेतकऱ्यांची मानसिकता बदललीय आहे. कोल्हापूर जिल्हयातील वडगणेचे प्रगतशील आणि प्रयोगशील शेतकरी शिवाजी पवार हे यापैंकीच एक... ऊस शेती आणि भाजीपाला शेतीतून म्हणावं तसं उत्पन्न मिळत नसल्याचं पाहून त्यांनी स्ट्राबेरी शेतीचा प्रयोग करण्याचं ठरवलं.

शिवाजी पवार यांनी आपल्या २० गुंठे शेतीत स्ट्राबेरी पिकाची लागवड केलीय. त्यासाठी त्यांना आतापर्यत सव्वा ते दीड लाख रुपये खर्च आलाय. यातून आतापर्यत त्यांना अडीच ते तीन लाख रुपयाचं उत्पन्न अपेक्षित आहे.  या शेतीचा प्रयोग करण्याआगोदर त्यांनी महाबळेश्वर,पाचगणी आणि रहिमतपुर इथं जावून तिथलं तापमान, मातीतील घटक यांचा सखोल अभ्यास केला, आणि त्यानंतरच स्ट्राबेरीची शेती करण्याचं ठरवलं. त्यांच्याया प्रयोगाला चांगलं यश मिळालंय.

शिवाजी पवार यांनी स्ट्रॉबेरी शेतीचा यशस्वी प्रयोग केल्यानंतर त्याचा हा प्रयोग पहाण्यासाठी कोल्हापूर जिल्हयातील अनेक ऊस आणि भाजीपाला उत्पादक शेतकरी भेट देत आहेत.
 
ऊस दरासाठी रस्त्यांवर उतरणाऱ्या शेतकऱ्यांना स्ट्रॉबेरी शेतीच्या निमित्तानं नवा पर्याय उभा राहिलाय, असंच म्हणावं लागेल.



• इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.

• झी २४ तासला ट्विटरवर फोलो करा.