भारत विरुद्ध पाकिस्तान (बॉल आऊटनं मिळवला विजय)

स्कॉटलंड विरुद्धच्या सामन्यात विजय प्राप्त केल्यानंतर पाकिस्तानवरही मात करण्यासाठी भारतीय टीम उत्सुक होती. पहिल्यांदा बॅटींग स्वीकारणाऱ्या भारताची सुरुवातीलाच ३६ रन्सवर ४ आऊट अशी दयनीय स्थिती होती. पाकच्या मोहम्मद असीफनं भारताची वरची फळी खिळखिळी केली होती. पण रॉबिन उथप्पा मैदानावर आला आणि त्यानं ही स्थिती सावरली. ५० बॉल्समध्ये त्यानं ३९ रन्सचं योगदान दिलं. उथप्पाचा हा आक्रमकपणा भारतीय टीमची जमेची बाजू ठरला. शेवटी शेवटी महेंद्रसिंग धोनी आणि इरफान पठान यांच्या तडाखेबंद खेळीनं भारतानं पाकिस्तानसमोर १४२ रन्सचं आव्हान उभं केलं. यावेळी भारताची धावसंख्या १४१/५ अशी होती.

पाकिस्ताननंही बॅटींगची करून विकेटसच्या बाबतीत भारताचीच री ओढली. पाकिस्ताननं ४७ रन्स करताना ४ गडी गमावले होते. पाक क्रिकेट फॅन्सलाही आता पाकिस्तान गटांगळ्या खाणार असं वाटत असतानाच मिसबाह उल हक यानं आपले बाजी पलटली. त्याच्या जोरदार खेळीमुळे पाकिस्तानी टीम विजयाच्या जवळ आली.

शेवटचे दोन बॉल बाकी असताना पाकिस्तानला गरज होती ती फक्त एका रनची. पण, नेमका यावेळीच मिसबाह रन आऊट झाला आणि मॅच टाय झाली. विजेता ठरवण्यासाठी बॉल आऊटचा पर्याय स्वीकारला गेला. ही पहिलीच वेळ होती जिथं बॉल आऊटनं विजेता संघ ठरवला गेला होता. सेहवाग, हरभजन आणि उथप्पा यांनी स्टंपला उडवून लावलं तर अराफत, उमर गुल आणि आफ्रिदी मात्र यात सपशेल अपयशी ठरले आणि भारताच्या गोटात एकच जल्लोष झाला.