`करीष्मा`चा करीष्मा : पुन्हा मोठ्या पडद्यावर

वारसा

२५ जून १९७४ रोजी कपूर खानदानात जन्मलेल्या करीष्माला सौंदर्याचा वारसा पणजोबांपासूनच मिळाला होता. गोरी गुलाबी नितळ कांती आणि निळे डोळे यामुळे तिचं सौंदर्य खुलून दिसायचं. त्यात तिचा अभिनय लाजवाबच होता. करीष्मा कपूर खानदानातील पहिली महिला कलाकार.. कपूर खानदानातील सूना-मुलींनी पडद्यावर यायचं नाही, ही प्रथा मोडून काढला तो करीष्मानेच

कुटुंबवत्सल

करीष्मा (लोलो) आपली आई आणि धाकटी बहीण करीना यांच्यासोबतच राहायची. आईची लाडकी असलेल्या लोलोला जे काही घडवलं, ते तिच्या आईनेच. ती पूर्णपणे आईच्या मर्जीनेच काम करते आणि करीनाला लहानपणापासून संभाळलं, ते करीषमानेच.. करीनाला चांगले सिनेमे निवडून देण्यात करीष्माचाच मोठा वाटा आहे.

आरंभ

कपूर खानदानातील पडद्यावर आलेली पहिली मुलगी म्हणजे करीष्मा. अभिनयाच्या आवडीमुळे तिने खानदानाची परंपराही मोडली. जेम-तेम १६ वर्षांची असताना तिने हरीष या अभिनेत्यासोबत प्रेम कैदी या सिनेमात काम केलं. या सिनेमात तिने बिकिनी घालून केलेल्या डान्समुळे भल्या भल्यांच्या काळजाचा ठोका चुकला.

राजा हिंदुस्तानी

करीष्माच्या अभिनयाचा महत्वपूर्ण ठसा उमटवणारा सिनेमा म्हणजे राजा हिंदुस्तानी.. तोपर्यंत करीष्मा सिनेमात असली, तरी तिची फारशी दखल कुणी घेत नव्हतं. पण ‘राजा हिंदुस्तानी’मध्ये ती आपल्या अभिनयामुळे काही प्रसंगात आमिर खानलाही भारी पडली. मनिष मल्होत्राने केलेल्या मेकओव्हरमुळे लोलोचं सौंदर्य दुप्पट वाढलं. त्यातही तिचं आमिरबरोबरचं पावसातील चुंबनदृश्य खूप गाजलं.

शापित राजकन्या

गोविंदा, अक्षय कुमार, सलमान खान यांच्यासोबत काम करत असल्यामुळे सिनेमे हिट होत होते. गोविंदा-करीष्माची जोडीतर प्रचंड लोकप्रिय होती. पण तरी करीष्माची स्वतःची ओळख निर्माण होत नव्हती. ‘झुबेदा’ या सिनेमातील तिचा अभिनय मात्र तिच्या अभिनय संपन्नतेची आणि सौंदर्याची उत्तुंग मजल गाठणारा ठरला. त्यात एखाद्या राजकन्येच्या दिमाखात वावरलेली करीष्मा म्हणजे परीकथेतली राणीच वाटली.

ब्रेक अप

अभिनयाचा बादशाह मानल्या गेलेल्या अमिताभ बच्चन यांच्या मुलाशी म्हणजेच अभिषेक बच्चनशी तोपर्यंत करीष्माचं सुत जुळलं होतं. दोन्ही घराण्यांनाही हा विवाह मान्य होता. त्यामुळे करीष्मा अभिषेकचा थाटामाटात साखरपुडा झाला. मात्र काही कारणांवरून हे लग्न होऊ शकलं नाही. करीष्मा- अभिषेकचं लग्न होण्यापूर्वी मोडलं. हा सगळ्यांसाठीच फार मोठा धक्का होता.

विवाह

बच्चन कुटुंबाशी काडीमोड घेतल्यावर करीष्माला लवकरात लवकर विवाह करणं भाग होतं. करीष्माच्या आईने तिचा विवाह तिचा बालमित्र आणि दिल्ली स्थित बिझनेसमन संजय कपूर यांच्या घडवून आणला. लवकरच त्यांच्यात पटत नसल्याच्या बातम्या प्रसिद्ध होऊ लागल्या. घटस्फोटापर्यंत हे प्रकरण आलं होतं. मात्र त्याचवेळी करीष्माला मुलगी झाल्यामुळे लग्नाला पुन्हा एक संधी देण्याचं दोघांनी ठरवलं.

आईच्या भूमिकेत

आज करीष्मा कपूर दोन मुलांची आई आहे. मुलगी समायरा वडलांसारखी दिसते, तर मुलगा तिच्यावर गेला आहे.करीष्मा आईच्या भूमिकेत खूश आहे.

नव्या दिशा

लोलोने आईची भूमिका स्वीकारल्यावर रुपेरी पडद्याला राम राम ठोकला असला तरी तिने व्यापारात स्वतःला गुंतवून घेतलं. बेबी ओये.कॉम या आपल्या व्यापारातून तिने इ-कॉमर्ससारख्या विषयात आपलं बिझनेस स्कील दाखवून दिलं.

टीव्ही

‘करीष्मा’ नामक टीव्ही मालिकेतून करीष्मा टीव्हीवर दाखल झाली होतीच. विवाहानंतर तिने पुन्हा एकदा टीव्हीवर पदार्पण केलं. नच बलिये कार्यक्रमात तिने परीक्षकाची भूमिका स्वीकारली.. बऱ्याच दिवसांनी तिला प्रेक्षकांपुढे आलेलं पाहून सगळ्यांनाच आनंद झाला.

पुन्हा मोठ्या पडद्यावर

लग्नानंतर करीष्माने करीनासाठी सिनेमाची वाट खुली करून दिली. मात्र ता करीनाही सुपरस्टार बनल्यावर करीष्मा पुन्हा मोठ्या पडद्यावर परतली आहे. रजनीश दुग्गल या अभिनेत्यासोबत तिने विक्रम भट्टच्या ‘डेंजरस इश्क’ या सिनेमात अभिनय केला. मात्र या सिनेमात तिने प्रमुख भूमिकाच साकारली. इतकी वर्षं लोटली तरी तिचं संदर्य कमी झालेलं नाही. त्यामुळेच ती प्रमुख भूमिका करू शकते.