चंद्रपूर साहित्यनगरीत 'माय मराठी'चा जयघोष

 
 
दगड अंगावर झेलण्याची तयारी ठेवा -  प्रा. डहाके
 
कुठलीही घटना घडली तरी असहिष्णुतेने दगड घेऊन बाहेर पडणारे आपण लोक सत्य मांडताना का घाबरतो? जे सत्य आहे ते उघड करताना साहित्यिकांनी, विशेषतः नव्या साहित्यिकांनी निर्भय होऊन लिखाण केले पाहिजे. दगड अंगावर झेलण्याची तयारी ठेवल्याशिवाय लिखाणाची ऊर्मी मिळणार नाही, असे स्पष्ट प्रतिपादन ८५ व्या अखिल भारतीय मराठी साहित्य संमेलनाचे अध्यक्ष, ज्येष्ठ कवी प्रा. वसंत आबाजी डहाके यांनी शुक्रवारी केले.
 
 
समाजाच्या कल्याणासाठी लिहिताना लेखणी आक्रमक करायची असेल तर प्रतिसादाची काळजी न करता लिहा. त्यातून नवे काहीतरी चांगले निर्माण झाले पाहिजे. शांती प्रस्थापित झाली पाहिजे. जागतिकीकरणाच्या झपाट्यापासून, चंगळवादाच्या धबडग्यापासून मुक्ती मिळेल, असे लिखाण झाले पाहिजे. सध्याचा काळ अशाप्रकारचे लिखाण करण्यासाठी सर्वोत्तम आहे, असे मला वाटते. मराठी भाषेला कुठल्याही प्रकारचा आजार झालेला नाही की ती शेवटची घटका मोजत असेल. माझ्या दृष्टीने जी भाषा दोन हजार वर्षे जगली तिला मरण येण्याची कल्पनाही आपण कशी करू शकतो? फक्त मराठीतील बोलींचे शासनाने, समाजाने संवर्धन करावे, एवढीच अपेक्षा आहे', असेही ते म्हणाले. महात्मा गांधींनी दाखविलेली अहिंसेची आणि मार्क्‍सने दाखविलेली परिवर्तनाची वाट आपण विसरलोय, अशी खंतही असे प्रा. वसंत डहाके यांनी व्यक्त केली.
 
 
न्या. धर्माधिकारी -
साने गुरुजींनी सांगितलेली आंतर भारतीची संकल्पना आपण राबवायला पाहिजे. केवळ एक दोन पाहुणे बाहेरचे बोलावले म्हणजे अखिल भारतीय होत नाही तर त्याचे संमेलनात दर्शन झाले पाहिजे. वाचक हा साहित्याचा विधाता आहे की विषय आहे, याची एकदा शहानिशा झाली पाहिजे. साहित्य आमच्यासाठी आहे काय, आदिवासींचे दुःख मांडणारे आहे काय, याची उत्तरे देता येतील का?  ज्यांच्या पंखात शक्ती नाही, त्यांना शक्ती देण्यासाठी लिहा. गोठलेल्या समाजातून साहित्य निर्माण होत नाही. त्यामुळे समाजाच्या व्यथा डोळ्यापुढे ठेवून नव्या पिढीसाठी लिहा.
 
 
संमेलनाचे मावळते अध्यक्ष उत्तम कांबळे  –
आपल्या शेजारची राज्ये भाषेसाठी काय करीत आहेत याचा शासनाने पुन्हा एकदा विचार करण्याची गरज आहे. राज्य शासनाने भाषेच्या विकासासाठी अधिकाधिक निधी खर्च करावा.

First Published: Saturday, February 4, 2012, 09:04