५० मेगापिक्सलचा 'फाईंड-७' देणार नोकियाला टक्कर?

www.24taas.com, झी मीडिया, मुंबई

स्मार्टफोनमध्ये उत्कृष्ठ आणि नवनवीन फिचर्स बाजारात उतरवण्यासाठी मोबाईल कंपन्यांमध्ये शीतयुद्ध सुरू झालंय. यामध्येही, कॅमेऱ्याची क्रेझ विशेषत: दिसून येते.

एकीकडे, नुकताच बाजारात दाखल झालेल्या सॅमसंग गॅलेक्सी एस-५ मध्ये १६ मेगापिक्सल ऑटोफोकस कॅमेऱ्याची सुविधा आहे. दुसरीकडे नोकियाचा ४१ मेगापिक्सलचा `ल्युमिया १०२०` आत्तापर्यंत कॅमेराप्रेमींचा लाडका बनलाय.

१९ मार्च रोजी बीजिंगमध्ये होणाऱ्या `ओप्पो लॉन्च इव्हेंट`मध्ये हा चीनी स्मार्टफोनमेकर ५० मेगापिक्सल कॅमेऱ्यासहीत स्मार्टफोन उतरवण्याच्या तयारीत आहे. असं जर घडलं, तर `ओप्पो`चा `फाईंड ७` हा स्मार्टफोन सगळ्यात जास्त मेगापिक्सलचा स्मार्टफोन ठरेल. नोकियाच्या ल्युमियाला हा स्मार्टफोन तोडीसतोड उत्तर ठरेल.

`ओप्पो` इव्हेंटची माहिती कंपनीनं नुकत्याच पोस्ट केलेल्या एका फोटोतून मिळतेय. १९ मार्च रोजी होणाऱ्या या इव्हेंटमध्ये `फाईंड ७` लॉन्च करण्यात येणार असल्याचं म्हटलंय.

याचसोबत फोर्ड क्लासिक कारचाही एक फोटो पोस्ट करण्यात आलाय. Weibo द्वारे अपलोड केलेला हा फोटो `फाईंड ७` कॅमेऱ्यानं घेण्यात आलाय. ५० मेगापिक्सलच्या कॅमेऱ्यातून घेण्यात आलेल्या फोटोची क्वालिटी फोटोतून स्पष्ट दिसून येतेय.




• इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.

• झी २४ तासला ट्विटरवर फोलो करा.