अमूलचे जनक वर्गिस कुरियन कालवश झाले तेव्हा...

भारतातील दुग्ध क्रांतीचे जनक आणि अमुल कंपनीचे संस्थापक डॉ . वर्गिस कुरियन यांचे निधन झाले. तेव्हा अमूल बेबीच्या डोळ्यातही पाणी आलं. स्वातंत्र्योत्तर काळात भारतासमोर दूधाचे उत्पादन वाढवण्याचे मोठे आव्हान होते. वर्गिस कुरियन यांच्या प्रयोगात्मक विचारांनी सहकार क्षेत्रात दूध आणि दूग्धजन्य पदार्थांना स्थान मिळाले. गुजरातच्या आणंदमधील गावागावात हे लोण पोहचले आणि दूधाचे उत्पादन मोठ्याप्रमाणावर होऊ लागले.

२६ नोव्हेंबर १९२१ रोजी केरळ येथे कुरियन यांचा जन्म झाला . पण जन्मभूमी केरळ असलेल्या कुरियन यांची कर्मभूमी ठरली ते गुजरातमधील आनंद . सहकार तत्त्वावर दूधाचा व्यवसाय यशस्वीरित्या करता येतो याचा आदर्श कुरियन यांनी घालून दिला .

गुजरात येथे १९७३मध्ये त्यांनी गुजरात को-ऑपरेटिव्ह मिल्क मार्केटिंग फेडरेशनची स्थापना केली. त्यांच्या कारभारामधील पारदर्शकता आणि कामगारांच्या हिताकडे लक्ष देणारे कुरियन यांना ३४ वर्ष अध्यक्षपदावर होते . अकरा हजारांहून अधिक गावे आणि २० लाखांपेक्षा जास्त शेतकरी सदस्य या संस्थेचे सदस्य आहेत. अर्थात यामागे कुरियन यांचा सदस्यांशी आणि कामगारांशी असलेला आपलेपणा ही आहे .